សេចក្ដីជូនដំណឹងលេខ ០១៤ សហវ ចុះថ្ងៃទី០៨ ខែឧសភា ឆ្នាំ ២០១៥ របស់ក្រសួងសេដ្ឋកិច្ចនិងហិរញ្ញវត្ថុ និងគណៈកម្មការមូលបត្រកម្ពុជា ស្ដីពីអង្គការមូលនិធិអភិវឌ្ឍន៍អាស៊ីអាគ្នេយ៍-(Asean Instrument Foundation) សមាគមអ្នកប្រឹក្សាវិនិយោគ-ICA (Investment Consultant Association) និងក្រុមហ៊ុន EBC (Empire Big Capital limited) ដែលមានទីតាំងនៅទីក្រុងហុងកុង បានរួមគ្នាធ្វើការផ្សព្វផ្សាយតាមបណ្ដាញផ្សព្វផ្សាយនិងសិក្ខាសាលានៅរាជធានី និងនៅតាមបណ្ដាខេត្តនានា ព្រមទាំងបានធ្វើការទាក់ទាញអតិថិជនថ្មីៗជាលក្ខណៈបណ្ដាញតៗគ្នា ដើម្បីឱ្យសាធារណជនដាក់ប្រាក់វិនិយោគដោយផ្ទាល់ ឬបើកគណនីនៅធនាគារ នៅក្នុងគម្រោងវិនិយោគរបស់ក្រុមហ៊ុន EBC ដោយសន្យាផ្ដល់ដល់អ្នកដាក់ប្រាក់វិនិយោគទាំងនោះនូវផលប្រយោជន៍ជាកម្រៃហិរញ្ញវត្ថុប្រចាំខែ ១០% សម្រាប់រយៈពេល ១៨ខែ ដែលជាប្រាក់ចំណេញខ្ពស់ខុសពីធម្មតា។ ក្រសួងសេដ្ឋកិច្ចនិងហិរញ្ញវត្ថុ និងគណៈកម្មការមូលបត្រកម្ពុជា សូមអំពាវនាវឱ្យសាធារណៈជនមេត្តាប្រុងប្រយ័ត្ន ក្នុងការដាក់ប្រាក់សន្សំ ឬដាក់ប្រាក់វិនិយោគនៅក្នុងគម្រោងវិនិយោគរបស់ក្រុមហ៊ុន EBC។ សេចក្តីប្រកាសព័ត៌មាន ថ្ងៃទី២១ ខែឧសភា ២០១៥
